لو جہاد اور ریورس لوجہاد

Shakeel Ashraf

May 11

ڈاکٹر نفیس اختر
ایک عرصہ سے انتہا پسند ہندو تنظیمیں یہ دعویٰ کر رہی ہیں کہ مسلمان ایک خفیہ پلان کے تحت اپنے نوجوانوں کو تیار اور استعمال کر رہے ہیں ۔ یہ نوجوان اپنی پہچان چھپا کر ہندو لڑکیوں سے دوستی کرتے ہیں ، پیار ومحبت کے دام میں گرفتار کرتے ہیں ۔ پھر یہ ہندو لڑکیاں پیار کے نشہ میں حقیقت معلوم ہونے کے بعد بھی اپنا دھرم پرہورتن کرکے ان سے شادیاں رچا لیتی ہیں اور مسلم بچے پیدا کرتی ہیں ۔ اگر یہی چلتا رہا تو ایک دن ہندو تعداد میں مسلمانوں سے بہت کم ہوجائیں گے ۔ بدقسمتی سے برسر اقتدار طبقہ بھی اس افواہ کو اپنے سیاسی فائدہ کے لئے استعمال کررہا ہے ۔ اور اس جھوٹے پروپیگنڈے کے ذریعہ فرقہ وارانہ منافرت کی آگ میں تیل ڈالنے کے کام میں اب گودی میڈیا کے ساتھ گودی فلم سازی نے بھی حصہ لینا شروع کردیا ہے ۔
ادھر کچھ عرصہ سے کچھ مسلم تنظیمیں اور قیادتیں بھی مسلمانوں میں ریورس جہاد کا خوف پھیلا رہی ہیں ۔ یعنی ان کے مطابق لوجہاد تو ایک فسانہ تھا لیکن اب ہندو نوجوان واقعی مسلم لڑکیوں سے دوستی کرکے انھیں مرتد کرکے شادیاں کر رہے ہیں ۔ ان میں سے چند ایک لوگ اسے کسی منصوبہ یا سازش کا حصہ تو نہیں مانتے لیکن مسلم لڑکیوں کا ارتداد اور غیر مسلموں سے شادی کرنا ان کے نزدیک بھی ایک بڑھتا ہوا مہلک رجحان ہے ۔ جس پر روک لگانے کے اقدامات نہ کئے گئے تو آیندہ نسلوں کے مرتد ہوجانے کا خطرہ درپیش ہو جائے گا ۔
حقیقت یہ ہے کہ کسی مسلم لڑکی کے غیر مسلم لڑکے سے دھرم بدل کر یا بغیر دھرم بدلے شادی کر لینے کے واقعات نئے نہیں ہیں اور نہ ہی کسی ہندو لڑکی کے مسلم بن کر یا بنا اسلام قبول کئے مسلم سے شادی کر لینے کے واقعات انوکھے ہیں ۔ ہاں البتہ یہ گنے چنے واقعات اب سوشل میڈیا کے ذریعہ اتنی تشہیر پا جارہے ہیں کہ اس کے ذریعہ سماج میں لوجہاد اور ریورس لوجہاد کا بے بنیاد خوف پھیلانے والے آسانی سے کامیاب ہورہے ہیں ۔
میں نہیں کہتا کہ بین المذاھب شادیوں کے واقعات میں تھوڑا بہت اضافہ نہیں ہوا ہے۔ یقینا ہوا ہے لیکن اس کی وجہ بس یہ ہے کہ سماج کی عمودی تقسیم جو فرقہ وارانہ تعامل کے بیچ ایک دہوار تھی ٹوٹ پھوٹ کا شکار ہوگئی ہے ۔ سماج اب فرقہ و مذہب کے بجائے طبقات میں منقسم ہوگیا ہے ۔ بین المذاھب میل جول، تجارت، تعامل اور تعلیم و تعلم نے ایک کو دوسرے سے اجنبی نہیں رہنے دیا ہے ۔ بڑھتی ہوئی باہمی سناشائی اور قربت سے بین المذاھب شادیوں میں فطری طور پر کچھ نہ کچھ اضافہ ہونا ہی تھا جو ہو رہا ہے۔
اس بات سے بھی انکار نہیں کیا جاسکتا کہ نفسیاتی رد عمل دونوں طرف یکساں ہیں ۔ کسی غیر مسلم لڑکی کے محبت کے نتیجہ میں اسلام قبول کرکے مسلم بہو بن جانے کے واقعات سے مسلمان بھی خوش ہوتے ہیں اور کسی مسلم لڑکی کے ہندو بن کر ہندو بہو بننے سے ہندو بھی ۔ اس طرح کے واقعات کی حوصلہ افزائی بھی دونوں طرف سے کی جاتی ہے ۔ البتہ سیاسی طاقت نے ایک کو کھل کر ایسا کرنے کا موقع دیا ہے تو سیاسی مجبوری نے دوسرے کو منافق بننے پر مجبور کیا ہوا ہے ۔ ہاں گھریلو سطح پر دونوں طرف ایک تضاد بھی ہے ۔ نو مسلم بہو مسلمان کو اپنے گھر میں نہیں صرف اپنے سماج میں پسند ہے ، ٹھیک اسی طرح نو ہندو بہو بھی کسی برہمن ٹھاکر کو اپنے گھر میں نہیں فقط اپنے سماج میں اچھی لگتی ہے ۔
لوجہاد یا ریورس لو جہاد دونوں ہی نہ تو سازشی پلان ہیں اور نہ ایسا ہونا ممکن ہی ہے ۔ دونوں طرف یہ محض ایک بے بنیاد خوف ہے کیونکہ دونوں اپنی بہن بیٹیوں پر بھروسہ نہیں کرتے ۔ کوئی سمجھتا ہے کہ محض مہنگے فون اور دھن دولت کی لالچ میں ان کی لڑکیاں و خواتین دھوکے کا شکار ہوجاتی ہیں تو اور کوئی یہ سمجھتا ہے کہ گھر سے باہر آزادی کا ماحول پاتے ہیں ان کی لاڈلیاں اپنے ایمان کا سودا کر بیٹھتی ہیں ۔۔
یہ سوال بھی ہے کہ کیا اکا دکا ہونے والی بین المذاھب شادیوں کے رجحان کو بڑھنے سے روکنا ضروری نہیں ہے ؟ میرا جواب ہے نہیں۔۔ بھارت کے ہر شہری کو مرد ہو یا عورت یہ حق حاصل ہے کہ کہ وہ اپنے لئے پسند کے جوڑے کا انتخاب کرے ۔ جو کوئی بھی اس کے استعمال میں رکاوٹ بنے یا زبردستی کرے وہ مجرم ہے ۔ پسند کے جوڑے کے انتخاب میں اگر کسی کے لئے مذہب اہم ہے تو وہ اس کا لحاظ رکھے گا مگر جس کے لئے مذہب زیادہ سنجیدہ معاملہ نہیں وہ کیونکر اسے اہمیت دے سکتا ہے؟ اور ہم آپ کون ہوتے ہیں کسی کو اس کی مرضی پر عمل کرنے سے روکنے والے ۔ ہر بالغ شہری حق خود ارادیت رکھتا ہے ۔۔ محض اس ڈر سے کہ وہ کوئی ایسا فیصلہ نہ کرلے جو آپ کو پسند نہ ہو اسے اس کے بنیادی حق تعلیم سے محروم کردینے کی سوچنا بھی مجرمانہ ذہنیت ہے ۔۔
امکان زیادہ ہے کہ اس دور میں بہن بیٹیوں پر بے جا پابندیاں انھیں مزید باغیانہ مزاج کا حامل بنائیں گی۔ ماڈرن ایج میں دو کمیونیٹیز کے اختلاط کے ( ایک تعلیم ہی نہیں ) اتنے ضروری اور غیر ضروری مواقع ہیں کہ اس پر روک لگانا ناممکن ہے ۔ کسی بیماری کی دیر پا روک تھام اب لاک ڈاؤن سے نہیں قوت مناعت سے ہی ممکن ہے ۔۔ اور بات صرف لڑکیوں کی نہیں ہے بلکہ خود مذاہب کی بھی ہے ۔ مذاہب بھی اب اختلاط و ایکسپوزر کے بازار میں ہیں ۔ ان کی بقا بھی اب ان کی قوت مناعت پر ٹکی ہے ۔ قوت مناعت ایکسپوزر بڑھانے سے ہی آتی ہے ۔ اس لئے مذاہب کو اب تقدس کے حصار سے باہر آکر خود کو تنقید کے لئے کھولنا ہوگا ۔ جس دئے میں واقعی عقل و دانش کا تیل ہوگا وہی روشن رہے گا ۔ جن کی محض بتیاں جل رہی ہیں وہ بجھ جائیں گے ۔۔ سچائی جس کے پاس ہوگی وہ تنقید کے عمل سے نکھر کر مزید آشکارا ہوگا ۔۔ سماج کی بقا و ترقی اسی میں ہے کہ نئی نسل کو بلا جنسی امتیاز کے تقلید و جمود کی بیڑیوں سے آزاد کرکے عقل و دانش کی روشنی عطا کی جائے ۔۔ اب مقدس بیڑیاں ارتداد کو روک پانے میں ناکام ہی رہیں گی ۔ اس لئے اگر آپ کو اپنے مذہب کے سچا ہونے کا یقین ہے تو بلا خوف نئی نسل کو عقل و دانش اور تنقید و تفحیص کی قابلیت اور مواقع سے نوازیں۔ مذہب سماجی اکراہ نہیں انفرادی آزادی کا معاملہ ہونا چاہئے ۔۔
مجھے یقین ہے کہ اسلام سچائیوں کا دین ہے ۔ ہمارے بچوں میں عقل و دانش کا پیدا ہونا ہی انھیں ارتداد سے بچائے گا ۔ مقدس بیڑیاں اور انھیں محض تقلید کا خوگر بنانا مسئلہ کا کاؤنٹر پروڈکٹیو حل ہے۔